Në seancën e parë stërvitore të Kosovës të pranishëm ishin 17 futbollistë, ndërsa në mesin e tyre ishte edhe futbollisti i Malishevës, Drilon Hazrollaj.
Hazrollaj për herë të parë është grumbulluar te Kosova pas formës fantastike që e ka treguar në Superligë, ku ka shënuar 18 gola.
Kosova këtë muaj i luan dy miqësore, me Armeninë (22 mars) në Yerevan dhe Hungarinë në Budapest tri ditë më vonë. Hazrollaj ka thënë se grumbullimin e parë me Kosovën po e shijon shumë, ndërsa ka shprehur optimizmin e tij sa i përket miqësoreve të këtij muaji.
“Ftesa e Kombëtares së Kosovës është privilegj dhe përgjegjësi. Shpresoj ta ndihmoj Kosovën pasi po kaloj në formë shumë të mirë me klubin tim. Grupi me ka pritur shumë mirë dhe më është dukur sikur të jem me vite pjesë e Kombëtares së Kosovës”, tha ndër të tjera ai pas stërvitjes për faqen zyrtare të FFK-së.
