Ka nisur me vonesë vazhdimi i seancës konstituive të Kuvendit të Kosovës, e cila ishte paraparë të fillonte në orën 14:00.
Punimet nisën pas orës 14:45, ndërsa kryetarja e Kuvendit, Albulena Haxhiu, nuk vazhdoi menjëherë me pikat e rendit të ditës.
Haxhiu iu bëri thirrje deputetëve të Partisë Demokratike të Kosovës që të rikthehen në sallë, në mënyrë që të vazhdohet me punimet e seancës.
Në rend dite mbetet zgjedhja e nënkryetarëve të Kuvendit, proces i cili nuk është përmbyllur ende.
Kreu i PDK-së, Bedri Hamza, pas mosvotimit të kandidates së kësaj partie për nënkryetare, Vlora Çitaku, nga deputetët e Lëvizjes Vetëvendosje (LVV), kishte deklaruar se PDK-ja nuk do të marrë më pjesë në punimet e Kuvendit.
Tash mbetet të shihet nëse deputetët e PDK-së do t’i përgjigjen thirrjes së kryeparlamentares Haxhiu dhe do të rikthehen në sallë për vazhdimin e seancës.
