Ministrja e Drejtësisë, Albulena Haxhiu sot ka vizituar Prokurorinë Themelore në Pejë, ku është pritur nga kryeprokurori Agim Kurmehaj dhe zv.kryeprokurori Ersan Çavolli.
Haxhiu ka thënë se i ka njoftuar për prioritetet e Drejtësisë që ndërlidhen me reformën, punën që po e bëjnë në fokus në adresimin e dhunës në familje, ku nga janari e deri tani në komunën e Pejës janë raportuar 258 raste të dhunës në familje.
“I njoftova për prioritetet tona që ndërlidhen me reformën, punën që po bëjmë me fokus në adresimin e dhunës në familje ku vetëm nga janari e deri më sot në Komunën e Pejës janë raportuar 258 raste të dhunës në familje si dhe i njoftova për politikat në fuqizimin e ligjeve dhe mekanizmave që merren me luftimin e krimit të organizuar dhe korrupsionin”, ka shkruar Haxhiu.
Tutje, ministrja ka thënë se është njoftuar për angazhimin e kryeprokurorëve, si dhe për numrin e vogël të prokurorëve 11 nga 19 prokurorë sa ishin, sipas ministres, pavarësisht kësaj rezultatet nuk kanë munguar.
“Pas takimit, vizituam hapësirat e kësaj prokurorie ku takuam prokurorë, bashkëpunëtorë profesional, zyrtarë ligjor, ndërmjetësues dhe staf tjetër administrativ.Në fund i falenderova për punën dhe angazhimin dhe i ofrova mbështetjen time për tejkalimin e sfidave”, shkroi ajo./teve1.info/