Besnik Hasi nuk do të jetë trajner i skuadrës së Mechelenit pas përfundimit të edicionit aktual.
Trajneri shqiptar nuk ka arritur marrëveshje me drejtuesit e klubit për rinovimin e kontratës dhe do të largohet në verë.
Edhe skuadra e Mechelenit nëpërmjet një komunikate ka zyrtarizuar largimin e Hasit me të përfunduar edicioni aktual. Klubi ka falënderuar Hasin për punën e tij këtë edicion, si dhe i ka dëshiruar suksese në të ardhmen.
Hasi mori drejtimin e Mechelenit në nëntor të vitit të shkuar kur ekipi ishte në krizë të rezultateve, ndërsa nën drejtimin e tij gjërat u përmirësuan.
Në të vërtetë, Mecheleni deri vonë ishte në garë për një vend në garat e UEFA-s, edicionin tjetër. Hasi do të jetë në krye të Mechelenit edhe katër ndeshje, ndërsa kontrata me klubin i skadon në muajin qershor.
Vet Hasi ka thënë se ndihet krenar me punën që e ka bërë te Mecheleni dhe rezultatet e arritura. Kohët e fundit është raportuar se Hasi prej edicionit të ardhshëm pritet të jetë trajner i Gentit, ekip më të cilin thuhet se parimisht ka arritur marrëveshje.
Për Hasin, interesim kanë shfaqur edhe Club Brugge e Antwerpi.