Kryetari i Aleancës për Ardhmërinë e Kosovës, Ramush Haradinaj, thotë se kryeministri i Kosovës, Albin Kurti po e lufton sistemin e drejtësisë të shtetit, ndërsa po i mbron “dosallarët e krimit”.
Haradinaj thotë se Kurti po i sulmon mediat, që sipas tij vetëm pse po i zbulojnë “hajnitë e miqtë matrapazë”.
“Ç’është ky kryeministër që e lufton sistemin e drejtësisë të shtetit të vet e i mbron ‘dosllarët’ e krimit! Ç’është ky njeri që e sulmon median e shtetit ku vet është kryeministër, veç pse ato i’a zbulojnë hajnitë e miqtë matrapazë! Ky njeri që vjedhjen e bukës së popullit, mundohet ta mbulojë me ‘borën e parvjeme’!”, ka shkruar Haradinaj në Facebook.
Tutje, Haradinaj ka shkruar se shkarkimi i kryeministri Kurti është detyrë kombëtare.
“Çka duhet të ndodhë tjetër që ju që keni votë, që keni zë, që keni mendje e zemër dhe që e doni Kosovën, të bindeni se shkarkimi i këtij njeriu, sot është detyrë kombëtare!”, ka shkruar ai.
Gjatë ditës së sotme, organet e rendit në Kosovë me urdhrin e Prokurorisë Speciale kanë arrestuar drejtorin e departamentit të rezervave shtetërore, Hafiz Garën, drejtorin e departamentin për integrime evropiane, Irgan Lipovica, si dhe afaristin Ridvan Muharremin, nën dyshimet se kanë bërë keqpërdorime sa u përket blerjeve të rezervave shtetërore.
Sipas Prokurorisë Speciale, të arrestuarit dyshohen për veprat penale “keqpërdorim i detyrës zyrtare” dhe “dhënie e ndihmës në kryerjen e veprës penale të keqpërdorimit të detyrës zyrtare”. Tre të arrestuarve iu është caktuar edhe masa a mbajtjes për 48 orë./teve1.info/
