Kryetari i Aleancës për Ardhmërinë e Kosovës (AAK), Ramush Haradinaj, ka shprehur skepticizëm lidhur me ndikimin e rezultateve të zgjedhjeve të së dielës në zgjidhjen e shqetësimeve të qytetarëve.
Përmes një postimi në Facebook, Haradinaj ka theksuar se qytetarët përballen me probleme të shumta, përfshirë kolapsin energjetik, ngecjet në proceset integruese euro-atlantike, rënien e investimeve kapitale, shtrenjtimin e jetesës, stagnimin e pagave dhe largimin masiv të të rinjve nga Kosova.
Ai ka paralajmëruar se, sipas tij, Kosova mund të dobësohet në planin e brendshëm dhe të jashtëm, dhe se “do të fitojnë armiqtë e saj”.
“Rezultati i këtyre zgjedhjeve e zgjidh ngërçin institucional, por kam frikë se nuk i zgjidh problemet e shqetësimet e qytetarëve,” ka shkruar Haradinaj.
Ai ka theksuar gjithashtu se partia do ta respektojë votën e qytetarëve dhe do të reflektojë për proceset e brendshme të saj.
“Rezultati është ky që është dhe ne do ta respektojmë votën e qytetarit, por dhe do të reflektojmë për proceset tona të brendshme.
Për ne zgjedhjet do të përfundojnë këtë pranverë, me zgjedhjet brenda Aleancës në të gjitha nivelet dhe me ringritjen tonë,” ka shtuar ai.
Në fund, Haradinaj ka falënderuar votuesit, aktivistët e AAK-së dhe partnerët nga Lista 129 për mbështetjen e tyre gjatë fushatës.
“Nga zemra i falëndëroj të gjithë votuesit, aktivistët e AAK-së dhe gjithë të tjerët nga çdo cilësi e përkatësi, e posaçërisht kolegët nga Lista 129 me të cilët kemi garuar në një betejë aspak të lehtë e në kohë të papërshtatshme. Krah Teje Kosovë, pa asnjë kusht,” ka përfunduar ai.
