Kryetari i Aleancës për Ardhmërinë e Kosovës, Ramush Haradinaj ka kujtuar 35 personat e vrarë në oborrin e shkollës në fshatin Bukosh të Suharekës, 26 vjet më parë.
Haradinaj ka thënë se sakrifica e shumë familjeve për lirinë e Kosovës i obligon të mos ndalen kurrë së kërkuari drejtësi dhe ndëshkim të atyre që urdhëruan krimet kundër popullit shqiptar.
“Dhembja për më të dashurit, do të na përcjellë tërë jetën, si shoqëri e si komb. Përulemi me respekt para të rënëve më 3 maj në Bukosh të Suharekës, 26 vjet më parë. Më 3 maj 1999, forcat serbe ndalën kolonën e civilëve nga fshatrat Vraniq, Bukosh, Savrovë e Sopijë, që po depërtoheshin drejt Shqipërisë. Nga ta, 35 vëllezër e motra u ndanë dhunshëm dhe u masakruan në oborrin e shkollës së Bukoshit, pa kursyer as të miturit, as pleqtë. Familje të tëra kanë derdhur gjak për lirinë e Kosovës. Kjo sakrificë na obligon të mos ndalemi kurrë në kërkimin e drejtësisë dhe ndëshkimin e atyre që urdhëruan këto krime kundër popullit shqiptar. I përhershëm kujtimi për ta”, ka shkruar ai në Facebook./teve1.info/
