Kryetari i Aleancës për Ardhmërinë e Kosovës, Ramush Haradinaj, ka akuzuar kryetarin e LDK-së, Lumir Abdixhiku për qëndrimet e tij përballë krizës në Kuvend.
Ai ka thënë se si parti kanë respektuar vendimin e Gjykatës Kushtetuese për daljen nga situata aktuale, duke thënë se vetëm Abdixhiku ka vendnumëruar dhe po vazhdon ta bëjë të njëjtën gjë.
“AAK e ka vërejtur muaj më parë që vendi po hyn në bllokadë të thellë institucionale dhe kjo ka ndodhur. Duke e parë këtë rrezik katastrofik për vendin, AAK e ka dërguar kërkesën për interpretim në Gjykatën Kushtetuese dhe ajo, me vendimin e saj të parë dhe të dytë, e ka vendosur modelin e daljes nga bllokada dhe ne jemi pozicionuar pro vendimit të Gjykatës. Kaq ka qenë përgjegjësia jonë dhe kaq kemi bërë. Veç Lumir Abdixhiku me të tijët, janë betonuar pro kësaj bllokade. Lumiri ka vendnumëruar në vazhdimësi dhe po vazhdon të vendnumërojë ende. Vazhdo të vendnumërosh se kjo të shkon për shtati ty, Lumir!”, ka shkruar Haradinaj.
Reagimi i Haradinaj vije pasi Abdixhiku akuzoi PDK-në e AAK-në që dhanë votat për Dimal Bashën i cili u zgjodh kryetar i Kuvendit.
Megjithatë, Kuvendi nuk u konstituua të mërkurën pasi nuk u votua nënkryetari nga Lista Serbe.
