Kryetari i Prishtinës, Përparim Rama, ka njoftuar se është inauguruar rrethi në hyrje të kryeqytetit nga magjistralja për Gjilan, një projekt që, sipas tij, do të lehtësojë qarkullimin e automjeteve dhe do të përmirësojë qasjen në Prishtinë.
Përmes një postimi në Facebook, Rama ka deklaruar se ndërtimi i këtij rrethi është përgjegjësi e Qeverisë Qendrore, pasi bëhet fjalë për një segment të rrugës magjistrale.
Ai ka akuzuar Qeverinë për neglizhencë, duke thënë se vonesat në realizimin e projektit e kanë detyruar Komunën e Prishtinës ta zbatojë vetë investimin.
“Rrethi në hyrje të Prishtinës nga Gjilani u kry. Ky rreth është përgjegjësi e Qeverisë Qendrore, sepse i takon rrugës magjistrale. Por meqë tash e 6 vjet kjo qeveri është marrë me përralla e ofendime e jo me punë, ne si Kryeqytet e kemi kry vetë këtë projekt, që me lehtësu trafikun dhe qasjen për qytetarët e Prishtinës e sidomos atyre që vijnë nga Gjilani”, ka shkruar Rama.
