Në orët e para të mëngjesit të së martës, masat e sigurisë u rritën.
Kjo pasi ura mbi lumin Ibër, që ndan Mitrovicën e Jugut me atë të Veriut, është gati për t’u hapur.
Nuk vonoi shumë dhe këtu vjen ministri në detyrë i Punëve të Brendshme, Xhelal Sveçla, si dhe zëvendësministri i Infrastrukturës, Hysen Durmishi.
Sapo gjithçka është gati, bëhet edhe hapja e urës së re mbi Ibër për qarkullim.
Ata që iu gëzuan më së shumti këtij lajmi janë qytetarët e dy komunave: Mitrovicës së Veriut dhe të Jugut.
Sipas tyre, kjo urë është dashur të ndërtohej më herët.
Veturat dhe qytetarët vazhduan të lëvizin lirshëm.
Por në pjesën veriore, Policia e Kosovës vazhdon të qëndrojë.
Jo ata të njësive speciale, por ata të rendit.
Këtë e konfirmoi zëvendësdrejtori i Policisë për rajonin e Veriut, Veton Elshani.
Sipas Elshanit, kjo urë do të monitorohet nga ana e Policisë së Kosovës.
Për hapjen e urës shkroi edhe kryeministri në detyrë, Albin Kurti, i cili uroi qytetarët dhe përgëzoi kompaninë për angazhimin që ai e quajti “shembullor”.
Qytetarët i uroi edhe ministri në detyrë i Punëve të Brendshme, Xhelal Sveçla.
Ura u hap në ditën e 55-të prej kur nisi ndërtimi i saj.
Ndërkohë, punimet në urën tjetër po vazhdojnë.
