Tenda u improvizua në vitin 2025.
Por, brendësia e saj të kujton ngjarjet e plot 26 vjetëve më parë.
Në këtë formë, Iniciativa e të Rinjve për të Drejtat Humanitare në Kosovë, përjetimet e refugjatëve kosovarë në Bllacë, i solli në Prishtinë.
“Tenda është një simbol i pjesës dërmuese të kujtesës së njerëzve që e kanë përjetuar luftën, sidomos të fëmijëve dhe ky është një element tjetër që kemi dashtë më shpërfaqë përmes kësaj ekspozite dhe muzeut në përgjithësi. 1:25 Gurët që po i shohim këto dhe mbi të cilët po ecim, janë marrë nga Bllaca”, thotë Marigona Shabiu- drejtoreshë ekzekutive në YIHR.
Por, kjo tendë nuk është i vetmi simbol që u bë pjesë e Muzeut të Fëmijëve të Luftës.
Dyert e muzeut “Loja e Ndërprerë” u hap të mërkurën për vizitorët.
Por, cili është qëllimi i muzeut që mblodhi kujtimet e fëmijëve të luftës në Kosovë?
“Ka për qëllim të dokumentojë dhe të ruaj storiet, rrëfimet më personale të njerëzve që kanë qenë fëmijë gjatë kohës së luftës. Në mënyrë që të nxjerrim një perspektivë tjetër, një nuancë tjetër asaj historie të tmerrshme që e kemi jetuar”, tregon Shabiu.
Në këtë muze vizitorët patën rastin ta shohin edhe këtë dritare.
Kjo e fundit u mbulua me batanije.
Arsyen për këtë, e zbuloi drejtoresha e Iniciativës së të Rinjve për të Drejtat Humanitare, Marigona Shabiu.
“Kjo dritare e simbolizon ikjen, fshehjen, sigurinë e brishtë që ka ekzistuar në atë kohë, e sidomos për fëmijët që kanë qenë duke jetuar momente tmerri e luftë. Kujtojmë që në të gjitha familjet për t’u ruajtur nga rreziqet e jashtme që vinin nga forcat e ushtrisë e policisë serbe, ata që kanë qëndruar në shtëpi, i kanë mbyllur dritaret gjatë natës në mënyrë që asnjë dritë të mos depërtojë jashtë”, thotë ajo.
Muzeu “Loja e Ndërprerë” ndodhet në rrugën “Ardian Krasniqi” në Prishtinë.
