Anëtari i Kryesisë së Lidhjes Demokratike të Kosovës, Muhamet Hamiti ka deklaruar se duke komentuar takimin e nesërm në Bruksel për çështjen e dinarit serb tha se në janar kryeministri Kurti thoshte se kjo çështje s’do të shkonte në dialog kurse tash sipas tij, do të diskutohet në tryezën e dialogut.
Me këtë rast, Hamiti tha se po ndodhin kthesa 180 shkallëshe në qëndrimet e kryeministrit Kurti, duke theksuar se procesi dialogut mes të dyja vendeve tashmë ka degraduar.
“Me 31 janar kryeministri Kurti thoshte se kjo është çështje sovrane se s’do të shkonte atje, tash po shkon. Do me thënë po ndodhin kthesa 180 shkallëshe qëndrimet e kryeministrit Kurti të kësaj Qeverie dhe kjo s’është hera e parë. Ka degraduar procesi i dialogut, sigurisht se Serbia s’ka qenë e interesuar për sukses të dialogut dhe jo vetëm për këto vite por edhe më herët ka dashur ta zvarrisë sepse i ka konvenuar. Kosovës nuk i ka konvenuar kurrë kjo zvarritje sepse status quo-ja i konvenonte Rusisë dhe Serbisë. Këtë e kemi thënë ne e kanë thënë miqtë tanë, kjo Qeveri e ka kuptuar vonë për fatin e keq të vendit, vonë po i kupton edhe mesazhet e Bashkësisë Ndërkombëtare dhe sidomos mesazhet që janë normale në komunikime diplomatike”, tha Hamiti në emisionin “InfoNata” në Tëvë1.
Derisa sa i përket raporteve të Kosovës me aleatët ndërkombëtarë, Hamiti tha se ShBA-të dhe BE-ja po detyrohen që të flasin me “gjuhë më të prerë”, për t’ia bërë të qartë Qeverisë mesazhet diplomatike.
“Pasi nuk po i kuptojnë përfaqësuesit amerikanë dhe të BE-së po detyrohen të flasin me një gjuhë shumë më të prerë dhe të përsëritur për t’ia bërë të qartë kësaj Qeverie dhe natyrisht qytetarëve të Kosovës se ku qëndrojnë raportet e Kosovës me aleatët, më saktë të Qeverisë së Kosovës me qeveritë e vendeve aleate”, shtoi ai.
Ndryshe, rregullorja e Bankës Qendrore të Kosovës do të jetë një ndër çështjet kryesore që do të diskutohet në takimin e së martës (27 shkurt) midis delegacionit të Kosovës dhe Serbisë në Bruksel.
Derisa kryeministri Albin Kurti, në fund të janarit, një ditë para hyrjes në fuqi të rregullores së BQK-së, kishte deklaruar se ndalimi i përdorimit të dinarit serb në vend është “çështje e panegociueshme” dhe nuk mund ta zhbëhet.
Kurti ka thënë se Qeveria e tij nuk do të ndërhyjë në vendimin e Bankës Qendrore, të cilën e ka quajtur të pavarur në zbatimin e rregullores së saj, të hyrë në fuqi më 1 shkurt../teve1.info./
