Ministrja e Industrisë, Ndërmarrësisë dhe Tregtisë (MINT) , Rozeta Hajdari, në kuadër të Javës për Mbrojtjen e Konsumatorit, ka thënë se prioritet i tyre është fuqizimi dhe mbrojtja e konsumatorit.
Hajdari në një konferencë për media, tha se mbrojtja e interesave ekonomike të konsumatorëve, siguria, cilësia dhe çmimet janë kyçe për MINT-in.
“Në funksion të përmirësimit cilësor të shërbimeve, MINT si prioritet ka fuqizimin e konsumatorëve në Republikën e Kosovës, të mbrojë interesat ekonomike të tyre, çështjen e sigurisë, zgjedhjes, cilësisë, çmimit, larmisë, disponueshmërisë, etj., e të ofrojë për konsumatorët mbikëqyrje bashkëkohore dhe transparencë të tregut, si dhe të mbrojë ata efektivisht nga rreziqet të cilët ata nuk mund t’i trajtojnë e zgjidhin në mënyrë individuale. Fuqizimi i konsumatorëve nuk është vetëm një e drejtë, por ka të bëjë edhe me krijimin e një mjedisi të përgjithshëm që u mundëson atyre të shfrytëzojnë këto të drejta dhe të përfitojnë prej tyre, që do të thotë krijim i një sistemi në të cilin ata mund të mbështeten”, tha ajo.
Po ashtu, Hajdari ka përmendur disa nga nismat që kanë ndërmarrë për fuqizimin e konsumatorëve.
“Për fuqizim të së drejtës së konsumatorit, ne kemi miratuar një sërë ligjesh e udhëzimesh administrative, që kanë impakt direkt në mbrojtjen dhe kujdesin ndaj konsumatorëve. Ligji për Mbrojtjen e Konkurrencës, Ligji për Markat Tregtare, Ligji për Inspektimet, e disa ligje tjera të miratuara vitin e kaluar, kanë forcuar aspektin rregullativ juridik. MINT ka nxjerrë edhe disa udhëzime administrative, në kuadër të kujdesit ndaj konsumatorëve, në mesin e tyre edhe ai për Rregullimin e Çmimeve të Produkteve të Naftës dhe Karburanteve të Ripërtërishme dhe masat e tjera mbrojtëse, i cili rregullon çmimet tavan”, tha ajo.
