Faton Peci, kandidat i Lëvizjes Vetëvendosje për komunën e Mitrovicës, ka deklaruar se për shkak të angazhimit në fushatën zgjedhore, nuk ka arritur t’i ndjekë në detaje zhvillimet e fundit.
“Për besë nuk po mundem me arrit me i ndjek të gjitha zhvillimet që janë duke ndodhur, për shkak të dinamikës së madhe që e kam në zgjedhjet komunale. Nuk i di krejt zhvillimet që kanë ndodhur, kam parë disa tituj, por deri sa të jap komente, kam dëshirë me qenë i mirë informuar. Nuk parapëlqej me dhënë deklarata pa qenë i informuar,” deklaroi ai në emisionin “Mesditë” në Tëvë1.
Për këtë, kryetari i OVL-UÇK, Hysni Gucati ka falënderuar kryeministrin e Shqipërisë, Edi Rama për ndihmën dhe përkrahjen siç tha ai që ua ka bërë krerëve të UÇK-së.
Ai ka kundërshtuar deklaratën e Pecit i cili ka thënë se nuk ka gjetur kohë t’i ndjekë zhvillimet në Hagë, ku sipas Gucatit janë gënjeshtra.
Madje, ai ka akuzuar edhe Qeverinë në detyrë, duke theksuar se as Qeveria nuk ka kohë të reagojë, pasi siç tha ai duhet të merret me “izolimin” që i është bërë nga Bashkësia Evropiane dhe ShBA.
“Na u deshën 25 vite presim që të vjen një njeri nga shteti mik nga Amerika dhe të iu tregon qytetarëve të cilët nuk e kanë kuptuar se kush është UÇK-ja dhe çfarë veprimesh ka bërë UÇK-ja, unë mendoi James Rubin një mik i madh i Kosovës e tregoi realitetin dhe të vërtetën. Qeveria e Kosovës nuk ka kohë, ka kohë të merret me izolimin e vet që e kanë izoluar Bashkësia Evropiane dhe ShBA-të, punën e qeverisë jemi duke e kryer ne. Është gënjeshtër e Pecit , kryeministri që nuk interesohet për qytetarin e vet është turpi më i madhi, Edi Rama ka jep ndihma të mëdha dhe ka punuar dhe punon shumë për krerët e UÇK-së. Nuk dua me diskutua as për Pecin e as për Kurtin le të jetë në ndërgjegjen e tyre”, ka deklaruar Gucati në emisionin “Mesditë” në tëvë1./teve1.info/
