Pas Shqipërisë, stacion i protestueseve do të jetë Franca.
Organizatat e dala nga lufta e Ushtrisë Çlirimtare të Kosovës kanë paralajmëruar që drejtësi për ish krerët e UÇK-së, do të kërkohet para Asamblesë Parlamentare të Këshillit të Evropës në Strasburg.
Në konferencën e mbajtur nga OVL e UÇK-së, u bë e ditur se protesta do të mbahet me 16 nëntor në orën 13:00.
“Arsyeja pse është zgjedhur ky vend, besoj e dini, sepse pikërisht në këtë vend, në Francë, në KiE është marrë vendim për një gjykatë të padrejtë që është bërë ndaj nesh. Është formuar një gjykatë e një etnie, ku vetëm shqiptarët dhe pjesëtarët e Ushtrisë Çlirimtare të Kosovës i përndjek. Kjo është një arsye pse ne kemi vendosur të mbajmë protestë para parlamentit. Ju e dini, Dick Marty padrejtësisht i bindi anëtarët e atij parlamenti që të votojnë atë gjykatë të mjeruar…”, tha kreu i OVL-UÇK-së, Hysni Gucati.
Ai ka dhënë detaje rreth kësaj proteste.
“Do të protestojmë për të kërkuar drejtësi dhe do t’ia përkujtojmë institucioneve të Evropës që e kanë votuar një gjykatë të padrejtë dhe me gënjeshtrat e Dick Martyt dhe disa njerëzve që kanë gënjyer atje dhe janë bërë dëshmitarë pa qenë në luftë e në Kosovë. Kemi vendosur që deputetëve të Parlamentit të Këshillit të Evropës t’ua dërgojmë edhe nga një letër, pikërisht për Gjykatën Speciale, dhe t’ua tregojmë atyre se çfarë kanë votuar. Të gjitha ato vërejtje, shkelje i kemi vendosur në dokumentacione për secilin deputet që ta lexojë dhe ta dijë vetë se çfarë gjykate janë duke financuar”, tha ai.
Nga këtu u bë thirrje që protesta të jetë sa ma masive.
“Iu bëjë thirrje bashkombësave tonë që të na bashkohen në Strasburgë, pasi qëllimi I jon është që ta sensibilzojmë edhe procesi është duke shkuar drejt përfundimit e ta senzibilizojmë që kjo gjykatë është duke bërë padrejtësi”, tha Fadil Shurdha – kryetar i invalidëve.
Gjatë kësaj konference u fol edhe për dëshminë që pritet të jep ish gjenerali Ëesli Clark,.
“Dëshmia e Clark do të jetë një bombë për ta. Një bombë shumë e madhe, pasi është një sukses i madh që kanë arritur ta bindin. Në Amerikë duhet të marrësh leje për të shkuar për të dëshmuar. E falënderojmë shtetin amerikan që i ka lejuar të dëshmojë dhe mezi po presim të dëgjojmë dëshminë e Clark më 19 nëntor”, tha Gucati
Paraprakisht, veteranët kanë mbajtur protesta në Prishtinë, Hagë dhe Tiranë, ndërsa, OVL e UÇK-së nuk parasheh për momentin që njëjta të mbahet në Shkup nuk do të mbahet për shkak të situatës politike atje.
