Koordinatori i Departamentit për Drejtësi në Partinë Demokratike të Kosovës (PDK), Përparim Gruda, thotë se do ta dërgojnë në Gjykatën Kushtetuese projektligjin për zyrtarët publikë, i miratuar të premten nga Qeveria.
Ai akuzoi se Qeveria e Kosovës ka tendencë për të shmangur zbatimin e aktgjykimit të Gjykatës Kushtetuese në mënyrë që t’i hapin rrugët për mbushjen e administratës së shtetit me militantët partiakë.
“Miratimi i këtij vendimi është bërë në kundërshtim të Kushtetutës dhe me aktgjykimin e Gjykatës Kushtetuese. Kjo është një tendencë e qartë e Qeverisë së Kosovës për të shmangur zbatimin e aktgjykimit të Gjykatës Kushtetuese dhe për të hapur mbushjes së administratës së shtetit me militantët partiakë, siç ka ndodhur fatkeqësisht gjatë këtyre tri viteve të qeverisjes”, tha ai në konferencë për media.
Sipas tij, Kosova është futur në një fazë zë re të shkelje të Gjykatës Kushtetuese.
“Kosova është futur në një fazë të re të shkeljes së Kushtetueses, tashmë nuk shkelen vetëm normat e shkruara në Kushtetutë, por nuk zbatohen edhe interpretimet e dhëna nga Gjykata Kushtetuese përmes aktgjykimeve të saj. Kjo është situatë skandaloze, ku Qeveria nuk tregon asnjë fije lojaliteti ndaj rendit kushtetues, asnjë fije besnikërie ndaj rendit kushtetues të Kosovës. Kjo nuk është hera e parë”, deklaroi ai.
Ndërkohë, ai tha se nëse projektligji kalon në Kuvend, atëherë PDK-ja do ta dërgojë në Gjykatën Kushtetuese.
“Nëse ky ligj kalon në Kuvend, në formën siç është miratuar në Qeveri, PDK do ta dërgojë këtë rast në Gjykatën Kushtetuese. Ne jemi të bindur se kjo do të shpallet jokushtetuese”, shtoi ai./teve1.info/
