Autori:Jona Kelmendi
Në dyert e hyrjes së objektit po vendosin një letër, me mbishkrimin”Grevë, dinjitet, zë”
Punëtorët e Radio Televizionit të Kosovës mëngjesin e kësaj të hënë kanë nisur grevën e përgjithshme.
Pasi siç thonë ata, kanë hyrë në ditën e 24 të muajit pa asnjë pagë, dhe kjo situatë mund ti qojë deri në ndërprerjen e punës.
“Kjo është një situatë që mundem me krahasu me vitet e 99-ta, është një situatë që nuk ka zgjidhje nëse nuk ka qeveri për me bë zgjidhjen e punëtorëve na jemi drejt kolapsit. Kjo ndikon shumë negativisht, mas pari na nuk kem pare rezervë e nëse vazhdon kështu duhet edhe me ndërpre punën s’kem zgjidhje tjetër”, është shprehur njëri nga punëtorët.
Kryetari i Sindikatës së Punëtorëve, Gëzim Bimbashi i është drejtuar me një kërkesë, Kryeministrit në detyrë që të ndërmarr hapa ligjor.
“Po hyjmë në muajin e dytë pa asnjë sinjal nga askush. Andaj injorimi i kërkesave tona na kanë sjellë deri këtu. Na kanë injoruar kërkesat si sindikatë, kemi bërë thirrje më herët në Kuvend, meqë u shpërbë Kuvendi, tani po bëjmë thirrje te Qeveria. I bëjmë thirrje kryeministrit Kurti të ndërmerr veprime menjeherë ligjore”, ka thënë Bimbashi.
Bimbashi, ka ta thënë që Sindikata e punëtorëve ka kërkuar që nëse vazhdon gjendja e njëjta, RTK ta bojkotojnë mbulimin e fushatës për zgjedhjet parlamentare të 28 dhjetorit.
E mbështetje Radio Televizionit të Kosovës i dha edhe Asociacioni i Gazetarëve të Kosovës.
“Bojkotimi i fushatës zgjedhore do të ishte hapi minimal i ngjarjeve politike. E theksojmë edhe njëherë që ne si AGK, siç kemi thënë në të kaluarën ka vetëm një adresë të përgjegjësisë që është Qeveria e Kosovës dhe është në dorën e kryeministrit Kurti dhe ministrit të finanacave Hekuran Murati. RTK është afër kolapsit, shpresoj se ky s’është interesi i Qeverisë së Kosovës që ta shoh të kolapsojë dhe të dështojë transmetuesi publik”, është shprehur Rexha .
Sindikata kanë paralajmëruar se greva do të vazhdojë deri në alokimin e buxhetit për RTK-në dhe, përveç grevës, do të organizojnë edhe protestë para Qeverisë dhe Kuvendit ditët në vijim.
