Google po sjell një risi të rëndësishme në aplikacionin e saj të njohur të hartave – një buton të ri “Aerial” që do ta bëjë shumë më të lehtë dhe më të shpejtë kalimin midis pamjes Street View dhe asaj Satelitore.
Kjo veçori, e zbuluar në versionin 25.39.07 të Google Maps për Android, u aktivizua para publikimit zyrtar nga Android Authority. Butoni lejon përdoruesit të kalojnë menjëherë nga pamja në rrugë në një perspektivë ajrore (satelitore), si në 2D ashtu edhe në 3D, duke e bërë eksplorimin virtual më të plotë dhe intuitiv.
Google ka investuar në animacione të rrjedhshme për ta bërë kalimin sa më natyral, madje aplikacioni mban mend drejtimin në të cilin po shikonit në Street View, kur ktheheni nga pamja Aerial.
Kjo veçori e re vjen si një ndihmë e madhe për përdoruesit që duan të eksplorojnë lagje, rrugë apo destinacione para se t’i vizitojnë fizikisht, dhe shkon në linjë me përmirësimet e fundit që Google ka bërë në navigimin me transport publik.
Publikimi zyrtar i butonit “Aerial” pritet së shpejti për të gjithë përdoruesit Android, ndërsa detajet për versionin në iOS nuk janë bërë ende të ditura.
