Analisti politik Ejup Gojnovci ka komentuar rezultatet e deritanishme të zgjedhjeve, duke vlerësuar se ato konfirmojnë mbështetjen e vazhdueshme për Lëvizjen Vetëvendosje dhe njëkohësisht paraqesin sfidë serioze për partitë opozitare.
Në emisionin “Ditari” në Tëvë1, Gojnovci tha se rezultatet tregojnë fitoren e tretë të LVV-së brenda një periudhe prej rreth një viti e gjysmë.
“Ky rezultat, sipas mendimit tim, po e konfirmon fitoren e tretë brenda një viti e gjysmë. Kjo duhet të jetë një brengë serioze për partitë e tjera opozitare. Ndërkaq, rezultati kaq i thellë i votës së mërgatës duhet të jetë alarm për subjektet e tjera politike, sepse 72 për qind janë numra të jashtëzakonshëm”, tha Gojnovci.
Ai theksoi se ndikimi i diasporës në proceset zgjedhore po bëhet gjithnjë e më i madh dhe se partitë politike duhet të gjejnë mënyra për ta fituar besimin e saj.
“Kur marrim parasysh se diaspora ka votuar vetëm në një pjesë të potencialit të saj dhe numri i votave nga jashtë mund të rritet edhe më shumë në të ardhmen, opozita mund të përballet me një situatë të vështirë politike nëse nuk ndërmerr hapa të rinj për ta bindur mërgatën që ta kthejë votën drejt tyre”, u shpreh ai.
Duke folur për mundësinë e formimit të institucioneve, Gojnovci vlerësoi se LVV-ja mund ta krijojë qeverinë edhe vetëm me mbështetjen e komuniteteve joserbe.
“Mendoj se me këtë rezultat, LVV-ja mund ta formojë e vetme qeverinë së bashku me minoritetet joserbe. Nëse dëshiron, mund ta ketë një qeveri të ngjashme me atë që është aktualisht në detyrë”, deklaroi ai.
Sipas Gojnovcit, çështja që mbetet më problematike është zgjedhja e presidentit, ndërsa opozita gjendet në një pozitë të vështirë pas rezultateve të fundit zgjedhore.
“Opozita, për shkak të këtyre humbjeve të njëpasnjëshme, nuk e ka të lehtë ta refuzojë një ofertë eventuale nga LVV-ja. Por, në anën tjetër, as LVV-ja nuk është në një situatë krejt të lehtë për t’i pranuar ofertat e tyre, duke pasur parasysh përshkallëzimin politik që ka ndodhur gjatë kësaj periudhe”, tha Gojnovci.
