Futbollistët e Kombëtares së Shqipërisë, të shtunën mbrëma e nisin rrugëtimin në sezonin e ri të Ligës së Kombeve.
Në Tiranë, Shqipëria do të përballet me Bjellorusinë, ndeshje kjo që nis në orën 20:45 dhe i takon grupit C 1.
UEFA, të enjten ka caktuar edhe gjyqtarët që do të ndajnë drejtësinë në këtë përballje, ku të gjithë janë nga Anglia.
Arbitër kryesor i këtij takimi, do të jetë Sam Barrot, i cili do të ndihmohet nga asistentët Adam Nunn e Wade Smith, ndërsa gjyqtar i katërt është caktuar Farai Hallam.
Në dhomën e VAR-it, kryesori do të jetë Matthew Donohue kurse asistent i tij, Paul Howard do të jetë në AVAR.
Pas ndeshjes me Bjellorusinë, Kombëtarja e Shqipërisë do ti ketë edhe tri duele tjera në kuadër të Ligës C të Ligës së Kombeve, ku do të përballet me Finlandën e San Marinon.
