Kolegji i Gjykatës Supreme ka refuzuar si të pabazuar ankesën e Lëvizjes Vetëvendosje (LVV) lidhur me vendimin e Panelit Zgjedhor për Ankesa dhe Parashtresa (PZAP), i cili ndalon votimin e bashkatdhetarëve në qendra të identifikuara jashtë përfaqësive diplomatike.
Në vendimin e publikuar të martën, Gjykata Supreme ka konfirmuar se vendimi i PZAP-së i datës 30 nëntor 2025 mbetet në fuqi.
“PZAP, me vendimin ZP.Anr.3/2025 të datës 30.11.2025, ka pranuar si të bazuar ankesën ZP.A.nr.3/2025 e parashtruar nga Lidhja Demokratike e Kosovës (LDK), dhe ka ndryshuar vendimin Nr.01/3438-2025 të KQZ-së, sa i përket Qendrave të Votimit jashtë Kosovës, numrit të vendvotimeve si dhe listës së qendrave të votimit, ashtu që qendrat e votimit të jenë vetëm përfaqësitë diplomatike të Republikës së Kosovës”, thuhet në komunikatën zyrtare.
Gjykata Supreme ka theksuar se pas shqyrtimit të dokumentacionit ka ardhur në përfundim se ankesa e LVV-së është e pabazuar, ndërsa vendimi i PZAP-së është “i drejtë dhe i ligjshëm”.
“Lejimi i qendrave të votimit vetëm brenda hapësirave të përfaqësive diplomatike është masë mbrojtëse për të siguruar integritetin e votës dhe kjo nuk paraqet pengesë në ushtrimin efektiv të të drejtës së votës së shtetasve të Republikës së Kosovës që jetojnë jashtë territorit të Kosovës”, thekson Gjykata Supreme.
Tutje, në komunikatë potencohet se:
“Republika e Kosovës iu ka garantuar të drejtën e votës edhe shtetasve që jetojnë jashtë vendit, mirëpo ka përcaktuar edhe kushtet ligjore për ushtrimin e kësaj të drejte”.
Lëvizja Vetëvendosje më 3 dhjetor 2025 kishte dorëzuar ankesë në Gjykatën Supreme, duke kundërshtuar vendimin e PZAP-së që votimi jashtë vendit të zhvillohet vetëm në përfaqësitë diplomatike të Kosovës.
Me vendimin e sotëm, të gjitha qendrat e votimit jashtë Kosovës për zgjedhjet e 28 dhjetorit 2025 do të jenë të kufizuara vetëm brenda hapësirave të ambasadave dhe konsullatave të Republikës së Kosovës.
