Atalanta ka dalë jashtë garës për titullin kampion, por objektivi kryesor tashmë është i qartë: një vend në Champions League për sezonin e ardhshëm.
Garancia vjen nga vetë kapiteni kuqezi, Berat Gjimshiti. Në një intervistë për mediat italiane, përpara sfidës së rëndësishme ndaj Milanit, mbrojtësi shqiptar theksoi se skuadra është e përqendruar dhe më e motivuar se kurrë.
“Kemi rifituar besimin pas fitores ndaj Bologna-s”, deklaroi Gjimshiti, duke theksuar rëndësinë e suksesit të fundit në kampionat. Tashmë vëmendja është te përballja e fundjavës kundër Milanit në transfertë, një ndeshje që në letër mund të jetë vendimtare për objektivin Champions, por kapiteni i Atalantës mendon ndryshe.
“Nuk e shoh si një përballje përcaktuese. Ne nuk bëjmë llogari. E vetmja gjë që mendojmë është të fitojmë çdo ndeshje. Ky është qëllimi ynë”, tha ai me vendosmëri.
Edhe pse po luan me dhimbje për shkak të një dëmtimi në kavilje, Gjimshiti mbetet një element kyç në prapavijën bergamaske dhe trajneri Gasperini shpreson ta ketë në formë optimale për sprintin final.
Atalanta aktualisht mban vendin e tretë në Serie A me 61 pikë, dy më shumë se Juventusi dhe katër më shumë se Bologna, gjashtë javë para përfundimit të sezonit.
