Kryetari i Gjilanit, Alban Hyseni, ka deklaruar se me miratimin, nga qeveria, të vendimit për shpronësimin e pronave në qarkoren e vjetër të qytetit, kësaj komune I janë kursyer së paku 20 milionë euro, nga vendimet e mundshme potenciale për këtë proces.
Duke mirëpritur vendimin përfundimtar të Qeverisë së Kosovës për shpronësimin për interes publik të pronave që preken nga realizimi i projektit “Qarkorja e Vjetër e Qytetit të Gjilanit”, Llot 1 dhe Llot 2, në zonat kadastrale Shillovë, Livoç i Ulët dhe Gjilan, ai tha se ky akt i hap rrugë realizimit të projektit për zgjerimin dhe modernizimin e kësaj zone, “ndërsa njëkohësisht u jep fund problemeve pronësore që datojnë nga periudha e paraluftës”.
“Qytetarët të cilëve u është marrë prona do të kompensohen, duke i hapur kështu rrugë Komunës së Gjilanit për realizimin e projektit për zgjerimin dhe modernizimin e kësaj zone”, thuhet në një njoftim të komunës së Gjilanit, transmeton KosovaPress.
