Që nga viti 2021 e deri në fund të vitit 2023, sipas Agjencisë së Statistikave të Kosovës, mbi 105 mijë qytetarë lëshuan Kosovën.
Trendi ka vazhduar, veçanërisht pas liberalizimit të vizave për Kosovën.
Teksa të rinjtë po largohen, kryetari i Sindikatës së Punëtorëve të Sektorit Privat, Jusuf Azemi, thotë se bizneset po mbesin pa punëtor.
“Ne shpeshherë qëndrojmë me pronar të kompanive dhe ata shtyhen mes vete se cili ta marr një punëtorë që është i lirë, është një kërkesë jashtëzakonisht shumë e madhe, sepse sipas të dhënave edhe të pronarëve shume projekte janë ngadalësuar për shkak të numri të vogël të punëtorëve”, tregon Azemi.
E kjo thotë se ka prekur pothuajse të gjitha kategoritë, pa dallim.
“Nuk ka proces që nuk ka mungesë të punëtorëve duke u nisur nga gastronomia, ndërtimtaria, nga çdo drejtim i punëve ka mungesë të punëtorëve”, thotë ai.
Largimi i fuqisë punëtorë nga vendi sipas ekonomistit Fidan Qerimi, lë pasoja edhe në ekonominë vendore.
Madje as ardhja e punëtorëve të huaj, nuk e bënë zëvendësimin, meqë paratë dalin jashtë Kosovës.
“Padyshim që pagesat ndaj tyre një pjesë i shpenzojnë për jetës por nuk bëjnë jetë luksi, me të cilat i ndihmojnë familjet e tyre, pra është një pjesë financiare e cila shkon jashtë vendit tonë”, shprehet Fidan Qerimi- ekonomist.
Ndër destinacionet kryesore të kosovarëve që synojnë të punojnë në vendet perëndimore, mbetet Gjermania.
