Më13 shkurt, doli para deputetëve.
E këtu, kryeministri i Kosovës, Albin Kurti, prezantoi 6 kushte.
Këto 6 pika sipas Kurtit, janë kushtet e tij, për themelimin e Asociacionit të Komunave me shumicë serbe në Kosovë.
Por, takimi i nivelit të lartë i së shtunës në Ohër, solli edhe dakordimin, që Kosova të fillojë menjëherë negociatat për krijimin e aranzhimeve dhe garancive specifike për të siguruar një nivel të duhur të vetë-menaxhimit për komunitetin serb në Kosovë.
“Për të zbatuar nenin 7, Kosova fillon menjëherë negociatat në kuadër të Dialogut të ndërmjetësuar nga BE-ja për krijimin e aranzhimeve dhe garancive specifike për të siguruar një nivel të duhur të vetë-menaxhimit për komunitetin serb në Kosovë, në përputhje me marrëveshjet e mëparshme përkatëse të Dialogut të përcaktuara nga ndërmjetësi i BE-së”, thuhet në pikë 5 të Aneksit.
Për këtë, njohësi i çështjeve politike, Dritëro Arifi, 6 kushtet e Kurtit që i prezantoi në Kuvendin e Kosovës, po i quan populiste.
“Ajo ka qenë një parullë tipike populiste. Vetëm një pikë ka qenë aty që duhet të bëhët, duhet të bëhet sipas ligjeve dhe Kushtetutës së Kosovës”, vlerësoi Arifi.
Ai thotë se Kosova që aneksi i Ohrit, e obligon Kosovën që punën ta fillojë e para.
“Në Ohër u bindëm që e gjithë barra t’i bije Kosovës, pra thotë menjëherë, që nga sot është dashur për themelimin e vetëmenaxhimit, asociacionit, apo çfarëdo që ta quajmë, pra pa njohje”, shtoi ai.
E mendim të njëjtë me Arifin, kanë edhe në Partinë Socialdemokrate të Kosovës.
Këta thonë se këto kushte, kanë fatin e 4 kushteve të mëhershme, që Kurti i pati prezantuar në Parlamentin Evropian për rifillimin e dialogut me Serbinë.
“Nëse i lexojmë një nga një, 3 të parat janë të përfshira në Planin Evropian, dhe përtej tyre nuk mundën me dal”, tha Lisjan Perolli, aktivist në PSD.
Nëse ekzekutivi do t’u qëndrojë prapa këtyre 6 kushteve për themelimin e Asociacionit të Komunave me shumicë serbe në Kosovë, Tëvë1 ka pyetur edhe në Zyrën e Kryeministrit.
Por të njëjtit, nuk kanë kthyer përgjigje të hënën.
Kronika e gazetarit Fidan Zejnullahu.
