Policia e Kosovës ka njoftuar se ka arrestuar katër persona nën dyshimin se të njëjtit kishin gjuajtur me armë zjarri në një aheng familjar në fshatin Ujz në Gjakovë.
Sipas njoftimit, sot është realizuar kontroll në tri lokacione, një në fshatin Damjan dhe dy në fshatin Ujz, ku edhe janë sekuestruar një armë e gjatë, tri pistoleta me nga një karikator, dhe 22 copë fishekë.
“Stacioni Policor në Gjakovë, kishte pranuar informacion përmes rrugëve operative dhe hetimore se në një aheng në fshatin Ujz në Gjakovë, me datën 22.07.2023, kishte pasur të shtëna me armë zjarri në një aheng familjar. Lidhur me informatën e pranuar, sot është realizuar kontroll në tri lokacione (një në fshatin Damjan dhe dy në fshatin Ujz). Në zbatim të urdhër kontrollit të lëshuar nga Gjykata, janë gjetur dhe janë sekuestruar një armë e gjatë, tri pistoleta me nga një karikator dhe 22 copë fishekë”, thuhet në njoftim.
Bëhet e ditur se pas intervistimit me vendim të prokurorit të njëjtit janë liruar në procedurë të rregullt.
“Ndaj tyre është iniciuar rast penal “Mbajtje në pronësi, kontroll ose posedim të paautorizuar të armëve” dhe “Shkaktim i rrezikut të përgjithshëm”, thuhet tutje./teve1.info./
