Mesfushori i talentuar i Antalyasporit, Amar Gërxhaliu është pritur të hënën nga presidenti i Federatës së Futbollit të Kosovës, Agim Ademi dhe bashkëpunëtorët e tij në ambientet e FFK-së.
Gërxhaliu është pjesë e ekipit U21 të Kosovës, ndërsa në të ardhmen pritet të luajë për ekipin A, pasi vlerësohet si lojtar me potencial. 20-vjeçari këtë sezon ka regjistruar 7 paraqitje me Antalyasporin, ekip me të cilin ka kontratë deri në vitin 2026. Ai ka thënë se ndihet i lumtur që është pjesë e Kosovës dhe dëshira e tij është që të vazhdojë të luaj me “Dardanët”.
Po ashtu, Gërxhaliu ka thënë se ndihet i kënaqur edhe me paraqitjet e tij që i ka treguar deri më tani me fanellën e Antalyasporit.
“Jam i lumtur që jam pjesë e Kosovës dhe kam dëshirë të vazhdoj të luaj me fanellën e Kosovës. Aktualisht jam pjesë e ekipit U21, por mezi po pres të luaj sa më shpejtë edhe me ekipin A”, ka theksuar Gërxhaliu pas takimit me kreun e FFK-së.
Gërxhaliu ka pranuar se synimi i tij është që në të ardhmen të jetë pjesë e njërës prej ligave më të forta të Evropës, por ka thënë se ëndrra e tij është që jetë pjesë e Kosovës dhe të kualifikohet në Evropianin 2024.
