Ministrja në detyrë e Punëve të Jashtme, Donika Gërvalla ka thënë se politika e jashtme e Serbisë nuk dallon nga ajo e Moskës.
Në një reagim në X pas deklaratave të presidentit serb, Aleksander Vuçiqi i cili paralajmëroi dyfishimin e numrit të ushtrisë, tha se Serbia kërcënimin më të madh e ka nga lidershipi i saj.
“Historia na ka mësuar se për të kuptuar qëllimet e Rusisë në rajonin tonë, duhet të vëzhgojmë veprimet e Serbisë. Serbia nuk ka një politikë të jashtme të ndryshme nga ajo e Moskës. Dje, presidenti i Serbisë shpalli rendin botëror të vdekur dhe tha se do ta dyfishojnë ushtrinë. Mesazhi është qartësisht si për Rusinë ashtu edhe për Rusinë. Fakti është se askush nuk po e kërcënon Serbinë. Kërcënimi i vërtetë qëndron te lidershipi i saj, i cili, në vend që të ndërtojë një vend normal evropian të përqendruar në reformat dhe demokracinë e BE-së, ëndërron një perandori rajonale – një mentalitet rus në miniaturë. Nuk do të ishte hera e parë që Serbia i vë flakën Evropës”, ka shkruar Gërvalla.
