Ministrja në detyrë e Punëve të Jashtme, Donika Gërvalla, duke folur për dy njohjet e fundit që ka pranuar Kosova, atë nga Kenia dhe Sudani, ka thënë se do të ketë edhe njohje të reja.
Ajo ka thënë kanë informacione konkrete se mund të ketë rezultate të reja, të cilat sipas saj, vijnë pas një pune kolosale.
“Jam shumë optimiste që kjo tendencë ka për të vazhduar. Kemi informacione konkrete se mund të ketë rezultate të reja të cilat vijnë si angazhim i një pune të përbashkët dhe kolosale”, ka thënë Gërvalla në emisionin “Këndi i Debatit” në Tëvë1.
Ajo ka thënë se njohjet nga Kenia e Sudani janë rezultat i punës së shumë segmenteve institucionale.
Gërvalla ka thanë se për këto njohje kanë punuar shumë ambasadorët e Kosovës por edhe ndihma nga partnerët.
“Unë jam ballafaquar me shumë kritika për mosnjohje. Pra kur s’ka njohje është përgjegjëse Donika Gërvalla, por nuk mund të mos jetë mospërgjegjëse nëse nuk vijnë njohjet. Pra, ose varet edhe nga ministrja e Jashtme ose nuk varet as njëra e as tjetra”, ka thënë ajo.
