Kryetari i grupit parlamentar të Lidhjes Demokratike të Kosovës (LDK), Arben Gashi, ka konfirmuar pjesëmarrjen e këtij subjekti parlamentar në votimin e marrëveshjeve ndërkombëtare, në seancën e së enjtes të Kuvendit të Kosovës.
Megjithatë, Gashi është shprehur skeptik për miratimin e ndonjë ligji gjatë kësaj legjislature pasi sipas tij shumica parlamentare është humbur.
“Po shkojmë drejt fundit të legjislatures dhe si duket problemet e kësaj legjislature dhe shumice parlamentare vazhdojnë dhe do të jetë e vështirë të miratohen ligje gjatë kësaj legjislature, por gjithsesi ne si parti opozitare jemi në funksion të interesit qytetar. LDK e ka konfirmuar dhe vazhdon ta konfirmojë pjesmarrjen në votimin e marrëveshjeve ndërkombëtare të cilat janë në interes të vendit por si duket shumica parlamentare është humbur dhe problemet vazhdojnë”, ka thënë ai në konferencën për media të mbajtur pas mbledhjes së kryesisë së Kuvendit.
Gashi, po ashtu ka shtuar se, Kosova vazhdon të jetë në një situatë të paaftësisë qeverisëse dhe korrupsioni gallopant si dhe me probleme në aspektin e përfaqësimit ndërkombëtar.
Kryesia e Kuvendit, në mbledhjen e së hënës ka vendosur që vazhdimi i seancës të mbahet të enjten e kësaj javë. /teve1.info/
Deputetët mblidhen të enjten në Kuvend, në rend dite votimi i marrëveshjeve ndërkombëtare
