Shefi i Grupit Parlamentar të Lidhjes Demokratike të Kosovës, Arben Gashi pas dështimit të mbajtjes së seancës së sotme në Kuvendin e Kosovës ka deklaruar se ky sesion përfundoi me turp ashtu siç kishte filluar.
Gashi tutje hodhi kritika ndaj Qeverisë për të cilën tha se karakterizohet me shkelje kushtetuese, skandale e korrupsion masiv.
“Sot përfundoi pra sesioni pranveror, përfundoi me turp ashtu siç filloi. Ky sesion dhe kjo qeverisje karakterizohet nga paaftësia dhe kapja e shtetit, karakterizohet nga shkeljet kushtetuese dhe me skandale që kanë të bëjnë si ato me të vajit, apo skandali “Zdravo”. Karakterizohet me korrupsion masiv, me kapje institucionale, dhe mbi të gjitha karakterizohet si qeverisje e shkeljeve kushtetuese”, tha ai.
Teksa shtoi se “Kosova nuk mundet me përballu një qeverisje të tillë dhe nuk duhet me përballu”.
Ndryshe, seanca e fundit plenare e thirrur për të premten (sot) nuk është mbajtur në mungesë të deputetëve.
Në mungesë të deputetëve, pas një orë pritjeje, nënkryetarja e Kuvendit, Saranda Bogujevci, e mbylli punën e legjislativit për këtë sesion, duke iu dëshiruar deputetëve pushime të këndshme./teve1.info./
