Nga 200 deri 370 euro duhet të jetë vlera e pensionit, sipas kryetarit të Shoqatës së Pensionistëve të Kosovës, Nijazi Gashi.
Ai i tha se në bazë të Ligjit për skemat pensionale çdo vit pensionet duhet të rriten në bazë të rritjes së inflacionit, për çka tha se Qeveria nuk e ka bërë kurrë këtë.
Gashi tha se Qeveria nuk është duke u marrë fare me pensionistët dhe nuk është duke iu përgjigjur fare kërkesave të tyre, duke shtuar se në këtë formë ata po nënçmohen, po fyen e po injorohen.
“Ne nuk kemi kërkuar kurrë rritje të pensioneve, sepse ajo është e garantuar me ligj dhe ne kemi kërkuar që Qeveria ta respektoj ligjin. Por, kjo qeveri nuk e ka respektuar kurrë dhe nuk po e respekton as sot dhe në mënyrë më të vrazhdë po e shkelë edhe sot dhe po na nënçmon, po na fyen, po na injoron. Sepse nuk merret me ne fare. Sa herë kemi bërë kërkesa edhe përmes email edhe përmes telefonave, na i mbyllin telefonat, nuk na i qelin telefonat e kështu me radhë. Thjeshtë nuk kemi komunikim, na kanë eks-komuniku si kategori dhe le të mbetet në ndërgjegjen e tyre kjo sjellje, por nuk ju bën nder”, tha Gashi
Ai tha se shuma prej 100 eurove pension bazë, sa marrin tani pensionistët, nuk mjaftojnë as ta kalojnë muajin, duke marr parasysh rritjen e madhe të çmimeve.
“Nuk janë të mjaftueshme ne e dimë sa i kemi. Pensioni bazë është 100 euro dhe një numër mjaft i madh i pensionistëve tonë varen prej atyre 100 eurove. Edhe këta që i kanë nga 190, 260 as këto nuk mjaftojnë, sepse ju jeni dëshmitar të një inflacioni drastik që ka ndodhur në Kosovë. Nëse llogaritet me shifra të inflacionit ajo del diku 60 për qind, unë po ju them që ka 200 për qind inflacion nëse shkojmë nëpër shitore për gjëra elementare për t’u furnizuar, shtrenjtimi ka ndodhur 200 për qind. Janë shtrenjtuar edhe barnat, janë shtrenjtua edhe lëndët djegëse për ngrohje, pastaj një kategori shumë e madhe e këtyre njerëzve nuk kanë sistem të ngrohjes. Nuk mundet, nuk ka shanse me mbyll muajin me 100 euro edhe nëse ato i ka vetëm për bukë”, tha ai për EO.
Gashi thotë se në bazë të ligjit për skemën pensionale, Qeveria ka për obligim që çdo fundvit të bëjë vlerësimin e rritjes së inflacionit dhe në bazë të kësaj t’i rriss pensionet.
Sipas tij, nga viti tjetër do të duhej që pensionet të jenë nga 350 deri 370, për pensionistët me shkollë të mesme do të duhej të ishin nga 250 ose 270 euro si dhe ai bazë sipas tij, duhet me qenë 200 euro.
“Në bazë të ligjit për skemat pensionale, Qeveria ka obligim çdo fundvit të bëjë vlerësimin e inflacionit dhe komfor inflacionit me rrit pensionet për vitin e ardhshëm. Këta nuk e kanë bërë këtë kurrë, këta e kanë pasur obligim me ligj me bë, nuk e kanë bërë dhe këtyre ju teprojnë pare me ka 700 milionë euro për një vit dhe këta nuk i rrisin pensionet. Do të thotë thjeshtë po na e marrin djersen tonë po na i marrin kontributet tona. Si ta quajmë këtë, ndaq e quajmë plaçkë, ndaq hajni, njëjtë është. Realisht tani pensionet duhen me qenë diku këta që janë me përgatitje të larta, 350 deri 370 euro, kurse me shkollë të mesme ish dashur me qenë 250 ose 270, kurse ai bazë duhet me qenë 200 euro”, tha ai.
