Kenan Gashi nga “Avonet”, ka deklaruar se Albulena Haxhiu pritet të jetë kandidate për kryetare të Kuvendit, duke theksuar se mospërzgjedhja e saj nga Lëvizja Vetëvendosje do të nënkuptonte mashtrim ndaj elektoratit.
Duke folur në emisionin “Ditari” në Tëvë1, Gashi ka theksuar se VV-ja do të binte në kundërshtim me parimet e saj nëse nuk e propozon Haxhiun për këtë post.
“Nëse Lëvizja Vetëvendosje nuk e vendos Albulena Haxhiun për kryetare të Kuvendit, atëherë do të thotë se e ka mashtruar opinionin publik dhe elektoratin. Kjo do të ishte në kundërshtim me parimet e saj dhe do të nënkuptonte stagnim të të gjithë procesit politik”, ka deklaruar Gashi.
Ai ka shtuar se, sipas tij, Vetëvendosje e ka pasur si objektiv tejkalimin e situatës aktuale politike dhe se propozimi i Haxhiut është pjesë e këtij procesi.
“Unë besoj se Albulena Haxhiu do të jetë kandidate për kryetare të Kuvendit dhe, në të njëjtën kohë, mendoj se ajo ka gjasa reale që edhe të zgjidhet në këtë pozitë”, ka thënë Gashi.
Gashi vlerësoi se Haxhiu tashmë e ka mundësinë politike për të marrë këtë rol, duke e konsideruar kandidaturën e saj si një hap të pritshëm nga Lëvizja Vetëvendosje.
