Lideri i Superligës në futboll vjen në kryeqytet për t’u sfiduar në derbin e vjetër me Prishtinën, që është përballja kryesore e javës së 20-të në futboll.
Drita udhëheqëse e kampionatit sivjet me 43 pikë, shtatë më shumë se Ballkani i vendit të dytë, vjen në formë të lartë prej 8 fitoreve në nëntë ndeshjet e fundit, si ekipi kryesor për të sfiduar titullin e kampionit sivjet.
Bardhekaltrit nga Gjilani u kualifikuan edhe në çerekfinale të Kupës së Kosovës, në një ndeshje të vështirë e të përcaktuar vetëm pas penalltive, andaj 120 minutat në këmbët e futbollistëve gjilanas, mund të jenë vendimtare përballë Prishtinës, që gjithashtu kaloj në çerekfinale, por me lehtësi ndaj Suharekës 4:0.
Kjo do të jetë ndeshja e tretë e këtij stinori ndërmjet këtyre dy skuadrave, në të cilat më mirë është paraqitur Drita. Skuadra e Zekirija Ramadanit e fitoi bindshëm ndeshjen e fundit 3:0 ndërsa në duelin e parë të këtij sezoni në “Fadil Vokrri” luajti baras 1:1.
Me barazim kanë përfunduar dy ndeshjet e fundit të Prishtinës në Superligë, që njëherësh e bëjnë atë skuadrën me më së shumti ndeshje që ka ndarë pikët me rivalët, gjithsej 7 herë.
Derbi i xhiros luhet të shtunën në “Fadil Vokrri” dhe zhvillohet nga ora 17:00.
Të shtunën zhvillohet edhe ndeshja ndërmjet Suharekës e Dukagjinit që nis nga ora 13:00.
Të dielën luhen dy ndeshje të tjera. Gjilani e pret në konak Ballkanin, derisa Feronikeli është nikoqir i Llapit, në përballjet që nisin nga ora 13:00, në Gjilan e Drenas.
Ndeshja e fundit e kësaj xhiroje luhet të martën, kur Malisheva e pret Ferizajn.
