Teksa shpalosi fotografitë të cilat i kishte realizuar gjatë luftës së fundit në Kosovë, Slivova në emisionin “ResPublika” në Tëvë1 rrëfeu për vrasjen e Agron Rrahmanit.
Slivova thotë se Rrahmani është vrarë nga forcat serbe me një granatë dore ku tregon pamje të banesës në të cilën ishte vrarë.
“Kjo është dhoma në lagjen e Muhaxherëve ku është vrarë Agron Rrahmani. Këtu kuptohet që ne nuk kemi mundur të shkojmë menjëherë dhe të bëjmë filmimin, por pasi që kanë ikur forcat serbe kam hyrë brenda dhe i kam bërë fotografitë. Që i njëjtit, anëtarët e njësitit Gueril të ashtuquajtur “BIA” sot është Agron Rrahmani, Bahriu, Iliri dhe Agroni. Agroni ishte pjesëtarë i saj prandaj quhet BIA. Kjo dhomë ku ka qëndruar shihen gjurmët e të shtënave ku policia serbe kanë hedhë granatë dore dhe e kanë mbytur me granatë dore. Kjo është kufoma e Agron Rrahmanit, nuk e kam pasur larg shtëpisë banesën ku ata kanë banuar me qira edhe kam shkuar herët në mëngjes në ora 07:00 ose 07:30 kam shkuar te këta”, rrëfen ai.
Slivova tutje tregon edhe pamje nga varrimi i Agron Rrahmanit i cili ishte vrarë nga forcat serbe me 12 maj të vitit 1998 në lagjen e Muhaxherëve në Prishtinë.
“Këtu është varrimi në fshat i Agron Rrahmanit, këtu shihen shumë njerëz që kanë qenë të njësitit Gueril po gjithçka ka filluar me idenë që të realizojmë diçka për popullin tonë dhe për opinionin, këtë e kemi pasur dhe gjithmonë kemi shkuar pavarësisht sakrificës apo çka na ka ndodhur, shumë gjëra na kanë ndodhur mirëpo ne e kemi vazhduar misionin tonë”, rrëfen Slivova.
Ndër të tjera Slivova thekson se njësitet guerile kanë ekzistuar në Prishtinë edhe pa filluar lufta e madhe me emrin UÇK. “Kam pasur fat t’i njoh shumë njerëz të takohem me ta, por jo edhe t’i fotografoj të gjithë”.
Agron Rrahmani ishte pjesëtar i njësiteve të para radhëve çlirimtare që vepronin në Llap, Prishtinë e gjetiu. Ai është vrarë më 12 maj të vitit 1998, në Lagjen e Muhaxherëve në Prishtinë./Teve1.info/
