Në ditën e dytë të zhvillimit të punimeve të Forumit Ndërkombëtarë “Ulpiana”, që po mbahet për herë të parë në Republikën e Kosovës u mbajtën shtatë panele të ndryshme tematike me 48 folës nga 21 shtete të botës.
Sipas një komunikate nga Ministria e Jashtme, hapjen e punimeve të ditës së dytë e bëri, Zëvendësministrja e Punëve të Jashtme dhe Diasporës e Republikës së Kosovës, Liza Gashi, duke ndarë me pjesëmarrësit përvojën me mërgatën tonë.
“Ne kemi krijuar Forumin Ndërkombëtarë Ulpiana, që të shërbejë si platformë dhe urë lidhëse me shtete tjera për të trajtuar modelet e ndryshme të angazhimit me diasporës, që të mësojmë nga modelet e vendeve të tjera. Sot, do të paraqesim draft modelin tonë dhe jemi shumë të interesuar që të pranojmë këndëvështrimet dhe sugjerimet tuaja”.
“Ne, kemi për qëllim të formalizojmë diplomacinë e diasporës si hap institucional përmes ambasadave dhe konsullatave”, ka thënë Gashi.
Në vazhdim paneli i parë i diskutimit u moderua nga drejtori ekzekutiv i Institutit të Rrjetëzimit në Irlandë, Kingsley Aikins, ndërsa trajtoi temën e angazhimit të diasporës.
Pjesë e tij ishin përfaqësues të lartë të punëve të jashtme të Kosovës, Maqedonisë së Veriut, Kroacisë dhe Shqipërisë, të cilët ndanë përvojat e tyre me diasporën vendase dhe angazhimit të tyre në proceset transformuese të shoqërive dhe shteteve të tyre.
Në kuadër të këtij diskutimi, zëvendëskryeministrja dhe Ministrja e Punëve të Jashtme dhe Diasporës, Donika Gërvalla-Schwarz, tha se ndihet e lumtur që në Qeverinë e Republikës së Kosovës dhe Institucionet e vendit ka gjetur një gatishmëri të madhe për ta bërë diasporën një nga prioritetet kryesore, duke theksuar rolin dhe kontributin e diasporës jo vetëm në aspektin e ndihmës financiare, që ata i sjellin zhvillimit dhe ekonomisë së vendit çdo vit me një të tretën e buxhetit, por edhe në zhvillimin social, politik dhe të demokracisë.
Ndërkaq, ministri i Punëve të Jashtme të Republikës së Maqedonisë së Veriut, Bujar Osmani, foli rreth diasporës së Maqedonisë së Veriut, duke theksuar se rëndësia e diasporës është e padiskutueshme, por që mbetet tejet me rëndësi çështja e parandalimit të trendit të vazhdueshëm të migrimit dhe kthimi i qytetarëve në vend për të ndaluar ikjen.
