Ish-shefja e Politikës së Jashtme të BE-së dhe ish-ndërmjetësuesja e dialogut Kosovë–Serbi, Federica Mogherini, është liruar pas marrjes në pyetje nga autoritetet belge nën dyshimin për mashtrim lidhur me financimin e Akademisë Evropiane Diplomatike, raporton “Euractiv”.
Së bashku me të janë liruar edhe Stefano Sannino, ish-sekretar i përgjithshëm i EEAS-it, si dhe Cesare Zegretti nga Kolegji i Evropës.
Policia belge ka konfirmuar se të tre nuk paraqesin rrezik për vazhdimin e hetimit.
Rasti lidhet me dyshimet për keqpërdorim të fondeve të BE-së nga EEAS-i dhe Kolegji i Evropës gjatë viteve 2021–2022.
Hetuesit po analizojnë nëse përfaqësues të Kolegjit kanë pasur qasje në informacione konfidenciale para hapjes së tenderit për Akademinë Diplomatike Evropiane. Një pjesë e hetimit fokusohet edhe në blerjen prej 3.2 milionë eurosh të një objekti në Brugge, vetëm pak para se projekti të merrte financim prej 654 mijë eurosh nga EEAS-i.
