Autore: Jona Kelmendi
Pasditja e së enjtes mblodhi studiues e diplomatë, në promovimin e librit që trajton rolin e Gjermanisë në periudhat kyçe politike të Kosovës.
Ngjarja u zhvillua në një ambient të hapur për debat dhe pyetje.
I pranishëm në promovim, si panelist ishte Dr Konrad Clewing i cili e cilësoi librin si një studim i fuqishëm ndërkombëtar.
“Libri përfaqëson një pjesë të rëndësishme të asaj që mund të quhet studime ndërkombëtare mbi Gjermaninë. Puna e Ukshinit dallohet dukshëm nga shumë libra historikë në gjuhën shqipe, autorët e të cilëve rrallëherë ndërmarin këtë hap të rëndësishëm, kështu që në faqet e para lexuesi ka arsye të gëzohet”, tha ai.
Edhe ambasadori i Kosovës në Tailandë, Muhamet Brajshori e vlerësoi lartë punën e autorit.
“Libri sjell fuqishëm idenë se mbyllja e çështjes gjermane në fund të viteve të 90ta krijoi mundësi për hapjen e çështjes së Kosovës 1 dhe këtu pas ribashkimit të Gjermanisë, Sylë Ukshini kujton se Gjermania nuk u përball me një mundësi të jashtme autonome, por me tri përkufizime”, tha ai.
E gjatë promovimit nuk munguan as diskutimet rreth librit.
Pjesë e tyre u bë edhe vetë autori i saj, Sylë Ukshini.
“Letra e dërguar nga C. Drejtuar Rugovës për të uruar për zgjedhjet në Kosovë bëhet një problem i madh brenda skenës politike gjermane edhe evropiane edhe në Serbi. Dhe me këtë po dua të them që kornizat e operimit të një shteti në politikën e jashtme kondicionohen dhe janë të kornizuara edhe nga faktorë të tjerë dhe parë nga kjo perspektivë në gjitha pikat e diskutimit në takimet që mbahen me liderët e Kosovës, gjithëherë është udhëzimi për përcaktimin që e mban Bashkimi Evropian”, u shpreh Ukshini.
Sipas pjesëmarrësve, eventi nuk ishte thjesht promovim libri, por një rikthim te faktet dhe te roli që diplomacia ndërkombëtare ka luajtur në fatin e Kosovës.
