Katër futbollistë prej listës së Franco Fodas të ftuar për ndeshjet e këtij muaji në kuadër të Ligës së Kombeve, nuk do të jenë në dispozicion për shkak të lëndimeve.
Në konferencën për shtyp, Foda ka konfirmuar se Milot Rashica, Leart Paqarada dhe Bersant Celina nuk do të jenë në dispozicion të tij. Po ashtu, shkaku i lëndimit mungon edhe Ermal Krasniqi, i cili nuk është ftuar fare.
Megjithatë, ai ka shtuar se tashmë në grumbullim ka ftuar Zymer Bytyqin dhe Art Smakajn.
“Fatkeqësisht kësaj radhe i kemi disa lëndime, nuk e kemi në dispozicion Rashicën, Paqaradën, Celinën. Me ekipin do të bashkohen Zymer Bytyqi dhe Art Smakaj”, ka thënë ndër të tjera Foda.
Kosova, të premten luan në Bukuresht kundër Rumanisë, përpara se tri ditë më vonë të përballet me Lituaninë në stadiumin “Fadil Vokrri” në Prishtinë”.
Sipas selektorit të Kosovës, vendi i prë në grup është i arritshëm por duhet patjetër të mposhtet Rumania.
“Vendi i parë është akoma i arritshëm, por duhet njëherë ta mposhtim Rumaninë. Në tri ndeshjet e fundit jam përgjithësisht i kënaqur me ekipin, por jo edhe aq pasi është dashur të shënojmë më shume gola”, shtoi Foda.
Ai insistoi se “Dardanët” shkojnë për fitore në Rumani.
