Filmi më i ri artistik i regjisorit Visar Morina, “Shame and Money”, do të shënojë premierën e tij botërore në Sundance Film Festival, një nga festivalet më prestigjioze të filmit në botë.
Lajmin e ka bërë të ditur Qendra Kinematografike e Kosovës përmes një postimi në Facebook, duke e vlerësuar paraqitjen e re të Morinës në kategorinë kryesore të festivalit si një arritje të veçantë, pasi është hera e dytë që ai konkurron në këtë seksion elitar.
Filmi sjell një kast të gjerë aktorësh të njohur, përfshirë Astrit Kabashi, Flonja Kodheli, Kumrije Hoxha, Fiona Gllavica, Alban Ukaj, Aria Shala, Riga Morina, Melika Gashi, Selman Lokaj, Teuta Hajdini, Abdinaser Beka, Rebeka Qena, Tristan Halilaj, Basri Lushtaku, Rafet Abazi, Besnik Krapi dhe Eshref Durmishi.
Filmi përshkruan dramën sociale të një familjeje kosovare që, pasi humbin jetesën e tyre në fshat detyrohet të zhvendoset në Prishtinë, në kërkim të një vendi në shoqërinë hiperkapitaliste.
“Shame and Money” është një prodhim i Vicky Bane dhe Schuldenberg Films, ndërsa producentët përfshijnë Fabian Altenried, Sophie Ahrens, Kristof Gerega, Pia Hellenthal dhe vetë Visar Morina.
Filmi është bashkëprodhim me Eagle Eye Films Kosova, Vertigo Ljubljana, On Film Production, List Production dhe Quetzalcoatl, me ko-producentë Eshref Durmishi, Besnik Krapi, Danijel Hočevar, Dritan Huqi, Marija Dimitrova dhe Marc Goyens.
Skenari mban firmën e Visar Morinës dhe Doruntina Bashës, ndërsa pas kamerës qëndron Drejtori i Fotografisë Janis Mazuch.
Ekipi kreativ përfshin gjithashtu montatoren Joëlle Alexis, kompozitorin Mario Batkovic, dizajnuesin e zërit Julij Zornik, drejtorin artistik Burim Arifi, Make-up Designer Talija Ivančič dhe Costume Designer Desantila Lika.
Projekti është mbështetur nga një numër institucionesh dhe fondesh filmike ndërkombëtare, përfshirë Commissioner for Culture and the Media, Qendrën Kinematografike të Kosovës, Eurimages, German Federal Film Fund, Film- und Medienstiftung NRW, Slovenian Film Centre, Qendrën Kombëtare të Kinematografisë, North Macedonia Film Agency, Tax Shelter of the Federal Government of Belgium, investitorë të Tax Shelter, WDR dhe Fondation Suisa.
Filmi është realizuar gjithashtu në bashkëpunim me Viba Film, uFund dhe Umedia.
Biletat për premierën e filmit në Sundance do të dalin në shitje më 14 janar.
Lajmin e ka përshëndetur edhe kryeministri Albin Kurti, i cili e ka ndarë njoftimin në llogarinë e tij zyrtare në Facebook, duke shkruar: “Urime regjisorit Visar Morina, aktorëve dhe gjithë ekipit krijues nga Kosova që po e çojnë punën e tyre në këtë skenë prestigjioze të filmit”.
