Kryetarja e kuvendit, njëherësh u.d. së presidentes së Kosovës, Albulena Haxhiu, ka ftuar për të premten (nesër) një takim me kryetarët e subjekteve politike që kanë siguruar ulëse në legjislaturën e re.
Takimi do të nisë në orën 11:00, ndërsa në fokus do të jenë procedurat për organizimin e seancës së parë të legjislaturës së XI-të, e cila është caktuar të mbahet më 6 gusht.
Në seancën konstituive pritet të bëhet verifikimi i kuorumit dhe mandateve të deputetëve, betimi i tyre, si dhe zgjedhja e kryetarit dhe nënkryetarëve të Kuvendit.
Sipas njoftimit të Kuvendit, takimi ka për qëllim koordinimin dhe përgatitjet për zhvillimin e kësaj seance.
Procedurat parlamentare parashohin që mbledhja përgatitore të zhvillohet para seancës konstituive, e cila udhëhiqet nga deputeti më i moshuar, i asistuar nga deputeti më i ri.
