Federata e Futbollit të Kosovës (FFK), ka reaguar pas dhunës së shfaqur në Gjilan pas përfundimit të ndeshjes së dytë gjysmëfinale të Kupës së Kosovës ndërmjet Dritës dhe Prishtinës.
Pas përfundimit të ndeshjes kishte tensione në fushë dhe jashtë saj, ku pati edhe konfrontim fizik mes drejtorit sportive të Dritës, Valon Zymberi dhe kryetifozit të “Intelektualëve” Taulant Byqmeti. P
as këtij rasti, Zymberi është arrestuar dhe është në mbajtje për 48 orë së bashku me dy persona tjerë.
Në reagimin e FFK-së, thuhet se kërcënimet dhe ofendimet në stadiume nuk kanë vend në futboll, ndërsa dhunën e shfaqur kohët e fundit e ka dënuar ashpër.
“Federata e Futbollit e Kosovës dënon ashpër retorikën e dhunës, kërcënimeve e ofendimeve të shfaqura në stadiume, në media dhe në të gjitha sferat e futbollit kohët e fundit. Ne ftojmë të gjithë pjesëmarrësit në këtë sport që t’u shmangen veprimeve që dëmtojnë reputacionin e futbollit. FFK, në bashkëpunim me Këshillin Kombëtar për Parandalimin e Dhunës dhe Dukurive Negative në Sport, institucionet e tjera shtetërore si dhe UEFA-n e FIFA-n, angazhohet në luftën e pakompromis kundër çdo forme parregullsie në futboll. Çdo veprim i kundërligjshëm do të ndëshkohet me vendosmëri, bazuar në faktet dhe rregullat e futbollit”, thuhet në reagimin e FFK-së.
FFK-ja insiston se futbolli nuk është vetëm garë sportive por edhe një formë e arëtimit, prandaj thotë se veprimet që shkelin vlerat e këtij sporti duhet të përjashtohen plotësisht dhe të mos gjejnë vend në të.
Po ashtu, ka shtuar se të gjithë pjesëmarrësit në futboll duhet të kuptojnë dhe të kujdesen për misionin e tyre: futbollistët për performancëne, trajnerët për edukimin dhe përgatitjen e ekipit, drejtuesit e klubeve për organizimin dhe krijimin e kushteve më të mira, gjyqtarët për drejtësi, tifozët për mbështetjen e klubit dhe korrektësinë ndaj kundërshtarit, dhe gazetarët për pasqyrimin e vlerave të futbollit dhe kritika pa tendencë.
“Edhe njëherë rikujtojmë çdo palë në futboll që FFK-ja është e pakompromis në luftën e dukurive negative dhe kushdo që e shkel integritetin e garave dhe rregulloret e garave do të ndëshkohet me dënimin më të rëndë, pasi do të ketë zero tolerancë ndaj të gjithë atyre që dëmntojnë futbollin.
Ne po e bëjmë të pamundurën për ta ngritur futbollin, për të licencuar trajnerë, për të ndihmuar në aspektin teknik, ekonomik e infrastrukturor, prandaj kërkojmë rregullsi dhe disiplinë sportive.
Edhe një herë ju lusim që ta ruani integritetin e garave, duke ju paralajmëruar njëherësh se të gjitha xhirot e mbetura janë të monituruara në maksimum” ka vazhduar FFK-ja.
Në fund të reagimit, FFK-ja ka insistuar se vetëm duke i bashkuar forcat mund të ruhet integriteti dhe reputacioni i futbollit në Kosovë.