Nga Austria erdhi për në Kosovë.
Mërgimtari Ramadan Shkreli, erdhi këtë të premte në vendlindje, por që vizitën kësaj radhe e ka për një arsye specifike.
Ndonëse, biletën e mori më shtrenjtë se zakonisht, kjo nuk e ndaloi që të vijë për të kryer një obligim të tij.
“Vetëm për zgjedhje, për tre ditë. Po besoj të bëjmë një qeveri mos të presim më gjatë, kjo është dëshira jem të ecë Kosova përpara. Po normal gjithë është më shtrenjtë puna që tani janë festat se me ardh në shkurt e janar janë shumë të lira”, deklaroi ai.
Edhe dikush që erdhi në Kosovë nga Gjermania thotë se biletën e mori me çmim tjetër në këtë kohë.
“Jo diçka si njëjtë ka qenë nuk ka qenë diçka ekstra më shtrenjtë, por mirë është nuk është keq”, tregoi mërgimtarja Valbone Muqolli.
Kurse nga Gjermania erdhi edhe mërgimtari Sadik Mulaj, i cili pret që Kosova të bëhet një vend më i mirë pas zgjedhjeve të 28 dhjetorit.
“Jam ardh nga Casel i Gjermanisë për vit të ri edhe shpresoj që ka me u bë mirë në Kosovë. Nga viti 2026 pres veç të mira, e inshalla ndërrohet pak kjo politika. Kam ardh për festa të fund viti por më shumë për me votuar”, tregoi ai.
Jo vetëm nga Evropa, pati mërgimtarë edhe nga Shtetet e Bashkuara të Amerikës.
“Për vit të ri vijmë gjithë, e për zgjedhje herë, herë, por këtë vit më shumë për zgjedhje se për vit të ri”, tha mërgimtari.
Por jo të gjithë erdhën të votuar, pati edhe nga ata që erdhën vetëm për vizitë.
“Vetëm për festa dhe me i taku familjarët pak”, tregoi mërgimtarja Majlinda Nikolla.
Televizioni ka provuar të marrë një përgjigje nga Aeroporti Ndërkombëtar i Prishtinës, lidhur me numrin e avionëve që ateruan në këtë aeroport dyjavëditëshin e fundit, por që nuk mori përgjigje.
E mërgimtarë të shumtë në prag të festave të fundvitit ia mësyn Kosovës edhe me mjetet e tjera të transportit. Kështu fluks këto ditë pati edhe në pikat kufitare
