Dy ndeshjet e luajtura të mërkurën në kuadër të xhiros së 29-të në Superligën e Kosovës në futboll, i kanë fituar skuadrat vendase.
Ferizaj e mposhti Malishevën 1:0 kurse edhe Llapi me rezultatin identik triumfoi ndaj Feronikelit ’74.
Për Ferizajn, kjo është fitorja e dytë rresht kurse golin e fitores e realizoi Edon Sadriu në minutën e 39-të.
Me këtë triumf, Ferizaj ngjitet përkohësisht në pozitën e katërt në tabelë me 41 pikë, gjashtë më pak se Malisheva që është e treta dhe pësoi humbje pas dy fitoreve rresht në kampionat.
Llapit pikët e plota ia siguroi Ardit Tahiri që shënoi nga penalltia në minutën e 45-të dhe me këtë fitore, ekipi i Tahir Batatinës ngjitet në pozitën e shtatë në tabelë me 36 pikë.
Ndërkohë, Feronikeli 74’ mbetet i fundit në tabelë me 14 pikë duke konfirmuar gjithnjë e më shumë rënien nga Superliga.
