Kryetari i partisë Guxo, Faton Peci, ka mbërritur sot në Presidencë për një takim me presidenten e vendit, Vjosa Osmani, në kuadër të përpjekjeve për tejkalimin e ngërçit institucional që ka bllokuar konstituimin e Kuvendit të Kosovës.
Peci, para takimit, u deklarua për media duke theksuar se këto takime janë të domosdoshme për të dalë nga bllokada politike që ka kapluar vendin.
“Përpjekja e radhës në përmirësim të gjendjes. Besoj që këto takime janë në funksion të daljes nga kjo bllokadë. Ne jemi me kontribu brenda mundësive”, deklaroi ai.
Takimi me Pecin është pjesë e një serie konsultimesh që Presidentja Osmani ka nisur prej ditës së mërkurë me liderët e partive parlamentare, për të gjetur një zgjidhje për krizën institucionale që po zvarritet që nga zgjedhjet e 9 shkurtit.
Të mërkurën, Osmani priti në kabinetin e saj kreun e Lëvizjes Vetëvendosje, Albin Kurti, si dhe liderët e partive opozitare: Memli Krasniqi (PDK), Lumir Abdixhiku (LDK) dhe Ramush Haradinaj (AAK). Në komunikatën e Zyrës së Presidencës u theksua rëndësia e përmbushjes së afatit kushtetues për konstituimin e institucioneve.
“Presidentja Osmani konsideron se moskonstituimi i institucioneve të reja të dala nga vullneti i qytetarëve më 9 shkurt dëmton vlerat demokratike, pengon përfitime shtetërore dhe zvogëlon besimin qytetar në institucione,” thuhet në deklaratën zyrtare.
Sot, më 3 korrik, deputetët e Kuvendit të Kosovës janë thirrur sërish për seancë, në përpjekjen e 41-të për konstituimin e legjislaturës së nëntë. Procesi ka ngecur në pikën e zgjedhjes së kryetarit të Kuvendit, për çka koalicioni qeverisës (VV-Guxo-Alternativa) nuk po arrin të sigurojë shumicën e thjeshtë prej 61 votash për kandidaturën e Albulena Haxhiut.
Partitë opozitare vazhdojnë ta konsiderojnë Haxhiun si një emër të papranueshëm, duke e cilësuar atë si jounifikuese dhe duke refuzuar mbështetjen për të.
Ngërçi po thellohet teksa afati 30-ditor i përcaktuar nga Gjykata Kushtetuese për konstituimin e Kuvendit është drejt përfundimit.
