Shitja e produkteve medicinale pa recetë të mjekut është e ndalueshme me ligj.
Megjithatë, në Kosovë në shumicën e barnatoreve ato mund të blihen edhe pa përshkrimin e mjekut.
E marrja e barnave nga ana e pacientëve të ndryshëm, pa konsultim me profesionistët shëndetësor po shihet si shqetësuese nga njohës të kësaj fushe.
“Fatkeqësisht nëpër barnatoret në Kosovë pacientët mund të marrin edhe antidepresiv pa recetë të mjekut. Një gjë e tillë është tejet shqetësuese për shkak të efekteve anësore që ka në shëndetin e pacientit. Por një gjë e tillë mendoj që duhet të zgjojë Ministrinë e Shëndetësisë, më saktësisht Inspektoratin Farmaceutik që të inspektojë sa më shumë nëpër barnatore”, thotë Diellza Luzha, njohëse e Shëndetësisë.
Por sipas Ministrisë së Shëndetësisë, Inspektorati Farmaceutik vetëm gjatë kësaj jave ka realizuar 17 inspektime.
Ndërsa shitjen e barnave pa recetë të mjekut, Shoqata e Pacientëve të Kosovës e konsideron jo profesionale.
“Farmacitë duhet ta shohin veten më shumë si institucion shëndetësor se sa si biznes. Edhe atyre ju konvenon për t’shitur barna por kjo është diçka jo profesionale dhe e dënueshme me ligj.
Gjigandët farmaceutik janë të interesuar të shesin sa më shumë barna dhe janë të interesuar ta ruajnë sa më shumë këtë status quo dhe ka njerëz aty ku duhet të bëjnë fushata që janë të gatshëm për t’i dëgjuar dhe gjigantët farmaceutik, prandaj jemi në këtë gjendje”, bëri të ditur Besim Kodra nga Shoqata e Pacientëve.
Sipas njohësve të kësaj fushe, periudha e pandemisë llogaritet si koha e abuzimit më të madh me barna.
Kronika e realizuar nga gazetarja Albiona Hajdari.
