Nga fshati Morinë të Skenderajt, ekipi i Tëvë1 sjellë detaje të reja sa i përket lirimit me kusht të Hysni Gucatit.
Nga atje gazetarja Florjeta Dernjani, njofton se Gucati pritet të vijë në Kosovë javën e ardhshme.
Ajo ka bërë të ditur se familjarëve iu është kumtuar lajmi se Gucati së shpejti do të vijë në shtëpi.
Sipas familjarëve, një vendim i tillë është marrë nga Gjykata Speciale dhe në javën e ardhshme i njëjti pritet të jetë në Kosovë.
Familjarët kanë treguar se lajmin e kanë pritur me shumë emocione.
Gucati, edhe sa kishte qenë në masën e paraburgimit kishte ardhur disa herë në Kosovë për shkak të gjendjes së rëndë shëndetësore të nënës së tij dhe vdekjes së babait.
Ndërsa, lidhur me lirimin e tij me kusht Gjykata Speciale për Tëvë1 ka thënë nëse do të ketë vendim publik për këtë çështje, ai do të bëhet publik në faqen e Dhomave të Specializuara.
“Nëse dhe kur nxirret një vendim publik për këtë çështje, ai do të jetë i disponueshëm në faqen e internetit të Dhomave të Specializuara”, ka thënë një zëdhënës i Speciales.
Gucati e Haradinaj janë arrestuar më 5 shtator të vitit 2020 dhe prej atëherë janë në qendrën e paraburgimit në Hagë.
Më 18 maj të vitit 2022 ata u shpallën fajtor për pengim të administrimit të drejtësisë dhe u dënuan me nga katër vjet e gjysmë burgim, duke llogaritur kohën e kaluar në paraburgim.
Ndërsa, në muajin shkurt të këtij viti Gjykata e Apelit në Dhomat e Specializuara të Kosovës vendosi të ulë dënimet vetëm për tre muaj./teve1.info/
