Përgatitjet për këtë ngjarje të madhe sportive, tashmë janë në fazën finale. Trajneri i Kosovës, Driton Kuka, përmes llogarisë së tij në Facebook, ka thënë se në vendin tonë, do të zbarkojë elita botërore e xhudos.
Sipas tij, kategoria 73 kg do jetë e ‘çmendur’ me emrat më të mëdhenj të xhudos Botërore sot për sot.
“Në kryeqytetin tonë javën tjetër do të zbarkojnë Elita e xhudos Botërore … Kampionati Evropian absolut deri 73 kg për meshkuj dhe deri 57 kg për femra mbahet më 16 dhjetor në Prishtinë. Hera parë të kemi nivel kaq të lartë në shtetin tonë. Kategoria 73 kg do jetë e çmendur me emra më të mëdhenj të xhudos Botërore sot për sot.
I pari i Ranglistës Botërore Azeri Hajdarov, legjenda e xhudos Kampion Olimpik Shavdatuashvili, nënkampioni Olimpik Italiani Lombardo do vijnë në Kosovë e për ne garojnë Akil Gjakova dhe Dardan Cena që do jenë të motivuar si kurrë më parë! Kategoria e femrave deri 57 kg përveç dy kampioneve tona Olimpike do marrin pjesë nga Elita Botërore edhe shumë medaliste Botërore e Evropiane!”, ka shkruar Kuka. Pallati i Rinisë dhe Sporteve në Prishtinë, sipas Kukës, me datë 16 dhjetor do shoh yjet e sportit të xhudos.
