Sipas zëdhënëses së EULEX-it, Donika Berisha, EULEX-i mbetet vigjilent dhe është duke i monitoruar për së afërmi të gjitha zhvillimet të cilat mund të ndikojnë në sigurinë e Kosovës, si dhe në sigurinë e të gjitha komuniteteve në Kosovë.
“Siç ka thënë Përfaqësuesi i Lartë i BE-së për Çështje të Jashtme dhe Politika të Sigurisë / Nënkryetari i Komisionit Evropian me 14 nëntor, jemi duke u përballur me krizën më të rrezikshme që nga viti 2013. EULEX-i mbetet vigjilent dhe është duke i monitoruar për së afërmi të gjitha zhvillimet të cilat mund të ndikojnë në sigurinë e Kosovës, si dhe në sigurinë e të gjitha komuniteteve në Kosovë.
Ne do ta bëjmë atë që është e nevojshme dhe atë që duhet për ta mbështetur stabilitetin e Kosovës, në suaza të mandatit tonë, si dhe të kontribuojmë për sigurinë e popullatës së saj”, thuhet në përgjigjen e Zyrës për Shtyp dhe Informim Publik të EULEX-it, dhënë për teve1.info
Ndërsa, pyetur se cila është gjendja e sigurisë në vend, EULEX ka thënë se situata e sigurisë në veri të Kosovës është shumë e brishtë.
“Situata e sigurisë në pjesën veriore të Kosovës është shumë e brishtë. Ne kemi shtuar në mënyrë të konsiderueshme patrullimet tona vëzhguese në bashkërendim me Policinë e Kosovës dhe KFOR-in dhe jemi duke u munduar që të sigurojmë popullatën vendase përmes prezencës tonë dukshëm të shtuar në pjesën veriore të Kosovës”, thuhet në përgjigje.
Sipas EULEX-it, është e rëndësishme që të gjithë njerëzit nga të gjitha komunitetet të jenë të sigurtë dhe të ndihen të sigurtë. /Teve1.info/
