Duke folur për Asociacionin, emisari i SHBA-së për Ballkanin Perëndimor, Gabriel Escobar ka thënë se kjo shikohet si obligim ndërkombëtar për Kosovën, dhe se duhet të zbatohet, pavarësisht se kush është në pushtet.
Sipas tij, sa më shpejt që të krijohet Asociacioni, do të jetë më mirë, shkruan Telegraf.rs, transmeton teve1.info
“Unë do t’ju jap një shembull. Por më lejoni të filloj këtu: këtu nuk bëhet fjalë për Kurtin. Kosova e ka nënshkruar këtë marrëveshje. Dhe Qeveria e Kosovës është e obliguar ligjërisht ta zbatojë atë. Është një detyrim ligjor ndërkombëtar ekzistues. Kështu e shohim ne. Është në marrëveshjen e Brukselit, është në këtë marrëveshje, është në konkluzionet e Këshillit të Evropës, dhe pjesë e politikës sonë. Do të bëhet realitet. Kjo do të ndodhë. Pyetja e vetme është se cila qeveri do të jetë ajo që do ta zbatojë atë. Sa më shpejt të ndodhë, aq më mirë. Dhe në realitet, kjo ka të bëjë me njohjen e të drejtës së njerëzve që janë pjesë e pakicës serbe në Kosovë për të qenë qytetarë të Serbisë dhe Kosovës”, është shprehur ai.
Tutje, Escobari potencon se Kosova është e detyruar ta zbatojë Asociacionin.
“Shikoni, nuk dua të komentoj për politikën e brendshme. Por ky është fakt: Kosova është e detyruar ta zbatojë Asociacionin. Dhe pyetja është vetëm se si dhe kush dhe çfarë. Nuk dua të duket si sfidë për kryeministrin Kurti. Fakti është se të gjithë presin, inkurajojnë dhe duan të punojnë së bashku me Kosovën në zbatimin e Asociacionit. Ky është vetëm një fakt”, ka shtuar ai.
Escobar është duke qëndruar në një vizitë dyditore në Kosovë, ku sot është takuar me liderët e partive opozitare.
Teksa nesër do të zhvillojë takim edhe me presidenten Vjosa Osmani dhe kryeministrin Albin Kurti.
Vizita e tij po ndodhë në prag të takimit të 18 marsit në Ohër ndërmjet kryeministrit të Kosovës, Albin Kurti dhe presidentit serb Aleksandar Vuçiq. /Teve1.info/
